अल्बानीमा २८ मे मंगलबारका दिन नेपाली कम्युनिटी डे हुँदैं

अमेरिका । न्यूयोर्क राज्य,जिल्ला ३० का लागि विधान सभा सदस्य स्टभेन रागाको कार्यालयको मुख्य प्रायोजन,विधान सभा सदस्यद्धय जेनिफर राजकुमार र सराहना श्रेष्ठको कार्यालय सह प्रायोजकको रुपमा रही नेपाली संघसंस्थाहरुको आयोजनामा न्यूयोर्क राज्यको राजधानी अल्बानीमा रहेको संसद भवनमा संसदमा नै पहिलो पल्ट यही आउँदो मे २८ तारिख मंगलबारका दिन"नेपाली कम्युनिटी डे अल्बानी"मा भव्यताकासाथ हुने भएको छ ।

शेर्पा किदुगको कार्यालय ज्याक्सन हाइटमा शुक्रबार साँझ आयोजित पत्रकार सम्मेलनमा जानकारी गराएनुसार स्टेभन रागाको कार्यालय र आयोजक समितिका पदाधिकारीहरुले मंगलबारका दिन न्यूयोर्क राज्यको राजधानी अल्बानीमा"नेपाली कम्युनिटी डे"को आयोजना गर्ने बताएका छन् ।

न्यूयोर्क राज्य विधान सभा सदस्यद्वय स्टेभन रागा र जेनिफर राजकुमार रागाको कार्यालयकी सामुदायिक मामिला निर्देशक फुर्साङ डोल्मा लामा र हालसम्ममा आयोजक समितिमा रहेका माइनोरिटी इम्पावरमेन्ट नेटवर्क कार्यकारी निर्देशक श्रीया तुलाधर,गैर आवासीय नेपाली संघ अमेरिका न्यूयोर्क च्याप्टर अध्यक्ष हेमन्त मल्ल,रिजवुड नेपाली समाज पदाधिकारी अमित शाह,शेर्पा किदुग अमेरिका अध्यक्ष तेम्बा शेर्पा,गिरिजाप्रसाद कोइराला फाउन्डेसन अमेरिका अध्यक्ष सोमनाथ घिमिरे लगायतका प्रतिनिधिहरुको उपस्थिति रहेको थियो ।

पत्रकार सम्मेलनमा कार्यक्रमबारे जानकारी गराउनु हुँदैं सामुदायिक मामिला निर्देशक फुर्साङ डोल्मा लामाले"नेपाली समुदाय डे"(नेपाली कम्युनिटी डे,अल्बानी) हामी सबै नेपालीहरुको साझा कार्यक्रम भएकाले यस महत्वपूर्ण कार्यक्रमलाई सफल बनाउन सबै एक हुनुपर्ने कुरा व्यक्त गर्नुहुँदैं,कार्यक्रममा हातेमालो गर्न चाहने संघसंस्थाहरु उपस्थितको लागि अनुरोध गर्नु भएको छ ।

सामुदायिक मामिला निर्देशक लामाले हालसम्ममा आयोजक समितिमा शेर्पा किदुग अमेरिका,गैर आवासीय नेपाली संघ,राष्ट्रिय समन्वय परिषद न्यूयोर्क च्याप्टर,गिरिजाप्रसाद कोइराला फाउन्डेसन अमेरिका,माइनो रिटी इम्पावरमेन्ट नेटवर्क,अल्बानी नेपाली समाज रहेको जनाएकी छिन् । यो कार्यक्रम अमेरिकामा प्रत्येक वर्षको मे महिनाको २८ तारिखका दिनलाई निरन्तर रुपमा"नेपाली कम्युनिटी डे अल्बानी"हुने सांसद रागाले जनाएका छन् । सो कार्यक्रममा नेपाललाई चिनाउने हिमाल,पहाड,मधेसलाई प्रतिनिधित्व गर्ने गरि विविध सांस्कृतिक कार्यक्रम,झाँकी,भेष,भुषा प्रदर्शनी रहने आयोजक पक्षले बताएको छ । नेपाली कम्युनिटी डे अल्बानी कार्यक्रममा आउने,जानेहरुलाई यातायातको समेत व्यवस्था गरिएको आयोजकले पत्रकार सम्मेलनमार्फत बताएका छन् ।