राजनीतिमा बसेको गलत संस्कारलाई तोड्दै अघि बढिरहेका छौं: ओली

काठमाडौं । नेकपा एमालेका अध्यक्ष केपी शर्मा ओलीले राजनीतिक वृत्तमा अराजनीतिक सोच हाबी भएको बताएका छन् ।

एमाले अध्यक्ष ओलीले आलोपालो गरेर प्रधानमन्त्री बन्ने विषयप्रति ईङ्कित गर्दै आलोपालो प्रधानमन्त्री बन्ने पद्धति ठिक नभएको उल्लेख गरेका हुन् । पद प्राप्त गर्ने कुरा संस्कारका रुपमा हेरिन थालिएकोले ओलीले यसप्रति खेद व्यक्त गर्छन् ।

 आफ्नो सामाजिक सञ्जाल फेसबुकमा ओलीले राजनीति अहिले तपाईंको पालो त्यसपछि मेरो पालो, मेरोपछि उसको पालो भनेर धारामा पानी थाप्न लाइन बसेजस्तो भएको उल्लेख गरेका हुन् । नेतृत्व गर्ने कुरा योग्यता, क्षमता, सक्रियता, बुझाइ र इमान्दारीमा भर पर्ने ओलीले प्रष्ट्याएका छन् ।

उल्लखित संस्कार बसाएर मात्र राजनीतिलाई गुणात्मक र परिणाममुखी बनाउन सकिन्छ । आलोपालो पदको अभ्यासले सञ्चारकर्मीदेखि समाजको ठूलो हिस्सालाई प्रभाव पारेको देखिएको ओलीको ठम्याई छ ।

पुर्व प्रधानमन्त्री समेत रहेका नेकपा एमाले अध्यक्ष थप लेख्छन्, 'हामी राजनीतिमा बसेको गलत संस्कारलाई तोड्दै अघि बढिरहेका छौं । राजनीतिलाई गुण/दोषमा आधारित रहेर परीक्षण गर्ने संस्कार बसालौं, आलो/पालो वा तेरो/मेरोमा आधारित रहेर होइन।'