तिमीहरूको यो खुरापाती राजनीतिक देखेर भगवान पनि वाक्क भइसके होलान् : ज्ञानेन्द्र शाही

राप्रपा पार्टी अध्यक्ष राजेन्द्र लिङ्गदेन र महामन्त्री धवल शमशेर राणापक्षबिच भएको विवादलाई केन्द्रित गर्दै उनले यस्तो टिप्पणी गरेका हुन् । 

शाहीले यतिखेरको समय एकअर्कालाई आरोप लगाएर टुट्ने र फुट्ने होइन नभई जुट्ने भएको उल्लेख गरेका छन् । 

पछिल्लो समय एक राजनीतिक दलभित्र देखिएको नेतृत्व विवाद र आन्तरिक खिचातानीप्रति युवापुस्ताले तीव्र असन्तुष्टि व्यक्त गरेर २०८२ भदौमा जेनजी विद्रोह भएको थियो । 

राप्रपामा नेतृत्व तहका व्यक्तिहरूबीचको निरन्तर आरोप–प्रत्यारोप, गुटगत प्रतिस्पर्धा र पदकेन्द्रित संघर्षले संगठनको एकता कमजोर बनाएको मात्र नभई कार्यकर्ता तथा समर्थकहरूको मनोबलसमेत खस्किँदै गएको सांसद शाहीको टिप्पणी छ ।

युवाहरूले देश र संगठनको भविष्य निर्माण गर्ने जिम्मेवारी नेतृत्व तहमा रहेका व्यक्तिहरूको काँधमा भए पनि व्यवहारमा भने एकता, सहकार्य र त्यागको भावना देखिन नसकेको उनले टिप्पणी गरेका छन् । अहिलेको आवश्यकता संगठनलाई थप बलियो बनाउने, मतभेदलाई संवादमार्फत समाधान गर्ने र साझा उद्देश्यका लागि एकजुट हुने हो । तर नेतृत्व तहमा देखिएको शक्ति संघर्ष र व्यक्तिगत महत्वाकांक्षाले कार्यकर्ताहरूबीच विभाजन बढाइरहेको शाहीले उल्लेख गरेका छन्।

नेतृत्वको मूल आधार पदमा टिकिरहनु मात्र नभई आवश्यक पर्दा जिम्मेवारी हस्तान्तरण गर्न सक्ने क्षमता र संगठनको हितलाई व्यक्तिगत स्वार्थभन्दा माथि राख्ने संस्कार हुनुपर्ने धारणा पनि व्यक्त गरिएको छ ।

एक पक्षले विज्ञप्तिबाजीमार्फत आफ्नो धारणा सार्वजनिक गरिरहेको तथा अर्को पक्षले छुट्टाछुट्टै भेला र गतिविधि सञ्चालन गरेर संगठन विभाजनतर्फ उन्मुख भएको सन्देश दिइरहेको भन्दै यसले आम कार्यकर्ता र युवाहरूमा निराशा बढाएको बताइएको छ ।

युवाहरूले नेतृत्व तहलाई सार्वजनिक आरोप–प्रत्यारोप र शक्ति प्रदर्शनभन्दा माथि उठेर खुला संवादमा बस्न, मतभेद समाधान गर्न र संगठन तथा देशको हितलाई केन्द्रमा राखेर निर्णय गर्न आग्रह गरेका छन् । उनीहरूको भनाइमा राजनीतिक दलहरूभित्रको एकता, पारदर्शिता र जिम्मेवार नेतृत्वले मात्र नयाँ पुस्तामा भरोसा जगाउन सक्छ, अन्यथा नेतृत्वप्रतिको विश्वास झन् कमजोर हुँदै जानेछ ।