ठुलादुर्लुङ ठाँटिभन्ज्याङका ५५ जना विद्यार्थीलाई न्यानो कपडा वितरण सम्पन्न

ललितपुर । महाङकाल गाउँपालिका वडा नं.६ ठुलादुर्लुङ,ठाँटिभन्ज्याङस्थित श्री ज्वालादेवी आधारभूत विद्यालयमा अध्ययनरत तामाङ,दलित तथा अन्य समुदायका ५५ जना विद्यार्थीहरुलाई दैनिक विद्यालय आउने वातावरण बनाउन,जाडोबाट बचाउन र गत असोज १२ गते शनिबार गएको बाढीपहिरोबाट त्रसित विद्यार्थीहरुको मनोबल बढाउन आज बिहीबार लोकेश्वर मिडिया सर्भिस,पुतलीसडक,काठमाडौंको संयोजनमा नेपाल तामाङ समाज जापानका केन्द्रीय अध्यक्ष कर्साङ सिङतान तामाङबाट रु.१५ हजार र ललितपुर जिल्ला,गोदावरी नगरपालिका वडा नं.१२ ठेचोकी सामाजिक अभियन्ता निर्मला क्षेत्रीबाट रु.७ हजार ५ रुपैयाँ व्यक्तिगत आर्थिक सहयोगमा वडा सदस्य राजकुमार घिमिरेको प्रमुख आतिथ्यमा न्यानो कपडा(ट्र्याकसुट) वितरण समारोह सम्पन्न भएको छ ।

विद्यालय व्यवस्थापन समितिका अध्यक्ष विष्णुबहादुर बस्नेतको सभाध्यक्षतामा वडासदस्य एवं प्रमुख अतिथि घिमिरेले विद्यालयका विद्यार्थीलाई न्यानो कपडा र शिक्षक कर्मचारी ६ जनालाई डायरी र डटपेन वितरण गर्नु भएको थियो ।

विद्यालयकी सहायक प्र.अ.शुशिला दहालले स्वागत मन्तव्य,प्र.अ.श्यामप्रसाद अधिकारीले कार्यक्रम संचालन गर्नु भएको समारोहमा शिक्षक अभिभावक संघ अध्यक्ष विवश सुनुवार,अभिभावक,विद्यालय व्यवस्थापन समिति,शिक्षक अभिभावक संघका पदाधिकारी,शिक्षक,कर्मचारी,विद्यार्थीहरुको सहभागि रहेको जनाएका छन् ।