छोकरपाखामा १२ जना विद्यार्थीलाई शैक्षिक सामग्री वितरण

ललितपुर । वाग्मती गाउँपालिका वडा नं. २ स्थित श्री नागदेवी आधारभूत विद्यालयमा १२ जना तामाङ तथा अन्य समुदायका विद्यार्थीहरूलाई शैक्षिक सामग्री वितरण गरिएको छ। यो कार्यक्रम तामाङ समुदायको नयाँ वर्ष, डुल ल्हो र सोनाम ल्होछारको अवसरमा, लोकेश्वर मिडिया सर्भिस, पुतलीसडक, काठमाडौंको संयोजनमा मंगलबार सम्पन्न भयो।

गएको असोज १२ गते आएको बाढी र पहिरोका कारण प्रभावित विद्यार्थीहरूको मनोबल बढाउन र विद्यालय आउने वातावरण सहज बनाउने उद्देश्यले कपि, पेन्सिल, इरेजर, कटर, स्केल जस्ता सामग्रीहरू वितरण गरिएको हो। विद्यालय व्यवस्थापन समितिका अध्यक्ष इन्द्रबहादुर जिम्बा तामाङ र विद्यालयका प्रधानाध्यापक ठाकुरमान ब्लोन तामाङको उपस्थितिमा उक्त कार्यक्रम सम्पन्न भएको थियो। कार्यक्रममा अभिभावक, शिक्षक, कर्मचारी र विद्यार्थीहरूको सहभागिता रहेको थियो ।