क्रोएसियामा पोस्ट सोनाम ल्होछार कार्यक्रम: नेपाली संस्कृतिको अन्तर्राष्ट्रियकरण

no-image

नमनखबर - २०८१-११-०७

जाग्रेब । क्रोएसियामा सोनाम ल्होछार लक्षित विशेष कार्यक्रम सम्पन्न भएको छ । नेपाली संस्कृति र कलाले भरिपूर्ण त्यस उत्सवले प्रवासी नेपालीहरूमा खुसीयाली, मनोरञ्जन र शुभकामना साटासाटको माहोल सिर्जना गरेको छ । 'विश्वभर छरिएर रहेका तामाङहरू एक हौं, हाम्रो भाषा, धर्म, संस्कार र संस्कृतिको जगेर्ना गरौं' भन्ने नारासहित आयोजना गरिएको कार्यक्रम क्रोएसियामा रहेका नेपाली समुदायबिच सोनाम ल्होछारको शुभकामना साटासाट गर्ने कोशेढुंगा साबित भएको आयोजकले जनाएको छ । कार्यक्रममा सांस्कृतिक मनोरञ्जनसँगै दैनिक जीवनबाट आराम लिई आफ्नो कला, संस्कृतिलाई प्रवासमा रहेर सम्झनुलाई विशेष रुपले हेरिएको छ । 
कार्यक्रम लामागुरु कमल योञ्जनद्वारा मोलम (पूजापाठ) गरि सुरु गरिएको थियो । २०२५ फेब्रुअरी ९ (माघ २७ गते) आइतबार राजधानी जाग्रेबस्थित प्रेच्को २ए (PRECKO 2A) मा भव्य रुपमा कार्यक्रम सम्पन्न भएको हो ।
सोनाम ल्होछार मन्जुश्री संवत २८६१ डुल ल्हो/ सा पुख्री सर्प वर्गको पावन अवसरमा आयोजना गरिएको कार्यक्रममा ख्यातिप्राप्त कलाकार पोर्चुगलबाट चर्चित सर्जक तथा सेलो गायक कुन्साङ वाईबा र मेहेन्दोमाया गायक तथा सर्जक पुष्पा वाईबाको आकर्षक प्रस्तुति रहेको थियो । सँगै स्थानीय कलाकारहरू तामाङ समाज क्रोसियाका वरिष्ठ उपाध्यक्ष बुद्ध लामा, गायिका दीपा तामाङ, माया थोकर, बिजय पाख्रिन, सनेत लामा, डीओपी (DOP) ब्याण्ड लगायतले आ-आफ्नो प्रस्तुति दिएर उत्सवलाई थप उम्दा बनाएका थिए ।
एनआरएनए क्रोएसियाका अध्यक्ष सुर्य बहादुर थिङ (साइमन लामा)को प्रमुख आतिथ्यतामा सम्पन्न भएको कार्यक्रममा विभिन्न मनोरञ्जनात्मक प्रस्तुतिका साथसाथै ल्होछारको शुभकामना आदानप्रदान कार्यक्रम पनि राखिएको थियो । 
क्रोएसियन नागरिक अतिथि र दर्शकको रुपमा उपस्थित कार्यक्रममा ७०० जनाभन्दा धेरै दर्शकहरूको उपस्थिति रहेको बताइएको छ । क्रोएसियाका विभिन्न शहरहरूमा पेशागत रूपमा कार्यरत तामाङ दाजुभाइ तथा दिदीबहिनीहरू एवं ल्होछार प्रेमीहरूको उपस्थितिले कार्यक्रमलाई थप जीवन्त बनाएको थियो ।  
तामाङ समाज क्रोएसियाका अध्यक्ष प्रकाशचन्द्र तामाङको सभापतित्वमा सम्पन्न भएको कार्यक्रमलाई सुकबहादुर तामाङ,  दिपक तामाङ र अमृता स्याङ्तानले सञ्चालन गरेका थिए । 
कार्यक्रममा विशेष अतिथिको रुपमा युवा समाजसेवी एवं आप्पा कम्पनीका प्रबन्ध निर्देशक दावा लामाको उपस्थिति रहेको थियो । 
तामाङ समाज क्रोएसियाले प्रवासमा तामाङ समुदायको धर्म, संस्कृति, भेषभूषा, परम्परा, रीतिरिवाजको संरक्षण र प्रवर्द्धन गर्दै आइरहेको छ ।


not-found

नमनखबर

"नमनखबरका लेखक एक समर्पित पत्रकारिता टोली हुन्, जो सत्य, विश्वसनीयता, र निष्पक्षताको मान्यताका साथ राष्ट्रिय र अन्तर्राष्ट्रिय समाचारहरू साझा गर्न प्रतिबद्ध छन्।"

0 Comments