राष्ट्रिय सोनाम ल्होछार कार्यक्रम भव्य रूपमा सम्पन्न

धुलिखेल । हाम्रो संस्कृति, हाम्रो पहिचान; तामाङ संस्कृतिको जगेर्ना गरौँ भन्ने नाराका साथ सभ्य रिमठिम तामाङ युवा समाजको आयोजनामा राष्ट्रिय सोनाम ल्होछार कार्यक्रम भव्य रूपमा सम्पन्न भयो। कार्यक्रमका प्रमुख अतिथि पूर्व मन्त्री तथा बागमती प्रदेशसभा सदस्य तिर्थ लामा रहनुभएको थियो।

कार्यक्रमका प्रमुख अतिथि तिर्थ लामाको मन्तव्य

उहाँले नेपाल बहुजातीय, बहुधार्मिक, बहुभाषिक र बहुसांस्कृतिक देश भएकाले सबै पर्व महत्त्वपूर्ण रहेको उल्लेख गर्नुभयो। साथै, शासन प्रशासनमा समानुपातिक सहभागिता नभएसम्म देशको विकास नहुने धारणा व्यक्त गर्नुभयो। २१औँ शताब्दीमा तामाङ समुदाय समाजका विभिन्न क्षेत्रमा अघि बढ्न सक्षम भएको भन्दै उहाँले बागमती सरकारले जुनसुकै सहयोग गर्न तयार रहेको बताउनुभयो। साथै, ल्होछार पर्व प्रत्येक वर्ष भव्य रूपमा मनाउन आग्रह गर्नुभयो।

विशिष्ट अतिथिहरूका भनाइ

विशिष्ट अतिथि निराजन जंगमले नगरभित्र जुनसुकै समस्या आए पनि आफूलाई सम्झन अनुरोध गर्नुभयो। साथै, यस्ता कार्यक्रमले समाज विकासमा टेवा पुर्‍याउने विश्वास व्यक्त गर्नुभयो।

रोशी गाउँपालिका अध्यक्ष दिनेश लामाले एकात्मक राज्य व्यवस्थाको समयमा धर्म बिर्संदै गएको उल्लेख गर्दै बहुदलीय प्रणाली आएपछि अन्य धर्म-संस्कृतिहरू पनि खुला रूपमा मनाउन थालिएको बताउनुभयो। ल्होछार पर्वलाई राष्ट्रिय तथा स्थानीय पर्वको रूपमा मनाउन आवश्यक रहेको उहाँको भनाइ थियो।

धुलिखेल-१ का वडा अध्यक्ष सन्तबहादुर लामाले संस्कार र संस्कृति रहे मात्र देश रहने बताउँदै तामाङ समुदायको मौलिक संस्कृति संरक्षण गर्न यस्ता कार्यक्रमहरू महत्त्वपूर्ण हुने धारणा राख्नुभयो।

नेपाल तामाङ युवा घेदुङ्को केन्द्रिय अध्यक्ष बिलाम मुक्तानले विगतमा तामाङ पात्रो नहुँदा समस्या हुने गरेको तर अहिले पात्रो बनेपछि ल्होछार मनाउन सहज भएको बताउनुभयो। साथै, दशैँमा जस्तै ल्होछारमा पनि कर्मचारीहरूलाई बोनस दिनुपर्नेमा जोड दिनुभयो। नेपाल तामाङ युवा घेदुङले वार्षिक २०-२१ जना विद्यार्थीलाई लोकसेवा आयोगका परीक्षाका लागि निःशुल्क तयारी गराइरहेको जानकारी गराउनुभयो।

कार्यक्रमको व्यवस्थापन र सभापतिको भनाइ

कार्यक्रमका सभापति एवं सभ्य रिमठिम तामाङ युवा समाजका अध्यक्ष विशाल तामाङ (पुजन) ले सबैको साथ र सहयोगले कार्यक्रम सफलतापूर्वक सम्पन्न भएको बताउनुभयो। साथै, आगामी वर्षहरूमा पनि यस्तै कार्यक्रमहरू निरन्तर आयोजना गर्न सबै पक्षको सहयोग आवश्यक रहेको उल्लेख गर्नुभयो। ल्होछार केवल रमाइलो पर्व मात्र नभई संस्कार-संस्कृति जोगाउने अवसर भएको उहाँको धारणा थियो।

सांस्कृतिक प्रस्तुति

कार्यक्रममा उर्गैन दोङ, सुशील लामा, रञ्जित तामाङ, कुसुम मगर, हिरा बहादुर तामाङ, युद्ध तामाङ, सागर बोम्जन, अनिशा तामाङ, सम्राट वाइवा, टुशाल लामा लगायत स्थानीय कलाकारहरूले उत्कृष्ट सांस्कृतिक प्रस्तुति दिएका थिए। यसरी राष्ट्रिय सोनाम ल्होछार कार्यक्रम भव्य रूपमा सम्पन्न भयो ।