सोनाम ल्होछारको अवसरमा ५ सरकारी विद्यालयमा अध्ययनरत १३४ विद्यार्थीलाई "शैक्षिक सामग्री" वितरण गरिने

बनेपा । लोकेश्वर मिडिया सर्भिस, पुतलीसडक,काठमाडौंको संयोजनमा, दाताहरुको आर्थिक सहयोगमा २०८१ माघ ७ गते सोमबार तामाङ समुदायको राष्ट्रिय सांस्कृतिक पर्व तथा नयाँ वर्ष, डुल ल्हो(सा पुख्री) सर्प वर्ग, मञ्जुश्री सम्वत २८६१ सोनाम ल्होछारको पावन अवसरमा मकवानपुर, काभ्रेपलाञ्चोक र नुवाकोट जिल्लाका दुर्गम स्थानमा रहेका ५ (पाँच) वटा सरकारी (सामुदायिक) विद्यालयहरुमा अध्ययनरत तामाङ, मगर, गुरुङ, दलित तथा अन्य समुदायका १३४ जना विद्यार्थीहरुलाई "शैक्षिक सामग्री"वितरण गरिने भएको छ । 

कार्यक्रम काभ्रेपलाञ्चोक, बेथानचोक गा.पा.६ महाङकालचौंर, भन्ज्याङखर्क श्री कालीदेवी प्रा.वि., खानीखोला गा.पा.-७ मिल्चे श्री सीता प्रा.वि., नुवाकोट म्यागङ गा.पा.-६ ठूलोडाँडा श्री सुन्दरादेवी आ.वि. र मकवानपुर जिल्ला, थाहानगरपालिका वडा नं.११ नागछेडा श्री जनता प्रा.वि. तथा नागन्झालस्थित श्री प्रभात प्राथमिक विद्यालयहरुमा अध्ययनरत विद्यार्थीहरुलाई दैनिक विद्यालय आउने वातावरण र गत असोज १२ गते शनिबार गएको बाढीपहिरोबाट त्रसित विद्यार्थीहरुको मनोबल बढाउन पूर्वघोषित कार्यक्रम गर्न लागेको लोकेश्वर मिडिया सर्भिसका प्रबन्ध निर्देशक श्याम तामाङले बताएका छन् ।