भावनादेखि प्रविधिसम्म सहयात्रा : बाजे बजै चौतारी तथा क्रेडिट कार्ड सुरु

पनौती । पनौती- ६ गुराँसमार्ग स्थित सहयात्रा देवीस्थान बहुउद्देश्यीय सहकारीले समुदाय र सदस्य लक्षित दुई नयाँ कार्यक्रमको सुरुवात गरेको छ ।  

सहकारीले काभ्रेपलाञ्चोक जिल्लामै पहिलो पटक बाजे बजै चौतारी कार्यक्रम तथा सहकारी पसल क्रेडिट कार्ड सेवा सुरु गरेको हो ।

संस्थाले पनौती नगरपालिका वडा नं. ४, एैरिगाँउ पुलबजारमा रहेको देवीस्थान सेवाकेन्द्र प्राङगणमा बाजेबजै चौतारी तथा सहकारी पसल क्रेडिट कार्ड अभिमुखीकरण गर्दै कार्यक्रमको औपचारिक रुपमै सुरुवात गरेको हो ।

 
संस्थाले शिक्षा उपसमितिको संयोजकत्व तथा देवीस्थान सेवाकेन्द्र संचालन उपसमितिको व्यवस्थापनमा एक औपचारिक कार्यक्रम मार्फत जेष्ठ नागरिकलाई अभिनन्दन गर्दै क्रेडिट कार्डको सेवाको समेत सुरुवात गरेको हो ।

कार्यक्रम पनौती नगरपालिका वडा नं.४ का वडाध्यक्ष दिपक प्रसाद दाहाल तथा सहकारीका अध्यक्ष गोविन्द प्रसाद न्यौपानेको अध्यक्षतामा सम्पन्न भएको थियो ।

वडा अध्यक्ष दाहालले ऐरीगाँउ समुदायका १५ जना ज्येष्ठ नागरिकलाई सम्मान गर्दै संस्थाले जारी गरेको  सहकारी पसल क्रेडिट कार्डका आवेदकहरुलाई कार्ड वितरण गर्नुभएको थियो । 

कार्यक्रमलाई सम्बोधन गर्दै वडाध्यक्ष दाहालले सहकारीमा समस्या र चुनौतीहरु थपिएको बताउँदै सदस्य आफै पनि व्याजको प्रलोभनमा परि पीडित भएको बताउनुभयो । ठग नियतका केहि सहकारी माफियाहरुका कारण असल सहकारीहरुलाई समेत काम गर्न गाह्रो भएको अध्यक्ष दाहालको स्पष्टोक्ति थियो । 

कार्यक्रममा संस्थाका प्रमुख व्यवस्थापक गौतम प्रजापतिले संस्थाबाट जारी क्रेडिट कार्डको नीति, नियम, उपयोगिता र कारोबार सिमा बारे जानकारी गराएका थिए । 

ज्येष्ठ नागरिक जीवन समय व्यवस्थापन विषयक प्रस्तुती सहजीकरण संस्थाका संस्थापक अध्यक्ष देव बहादुर तामाङले गरेका थिए । 

कार्यक्रमको सञ्चालन संस्थाका सचिव हरिशंकर तिमल्सिनाले गरेका थिए । कार्यक्रम संस्थाका अध्यक्ष गोविन्द प्रसाद न्यौपानेको अध्यक्षतामा सम्पन्न भएको थियो । 

बाजे बज्यै चौतारी 
बाजे बज्यै चौतारी कार्यक्रम अन्तर्गत सहकारीले जेष्ठ नागरिकलाई उनीहरूका जीवनमा भोगाईसम्बन्धी घटना भन्न लगाई सम्मान गरिने कार्यक्रम हो । नयाँ पुस्तालाई पुराना पुस्ताका दु:ख र भोगाई बारे जानकारी गराउने उद्धेश्यले कार्यक्रम सुरु गरिएको हो । वृद्दवृद्दालाईको भावनालाई सम्बोधन गर्ने वातावरणको सिर्जना गर्न र वृद्धवृद्धको जीवनका अविष्मरणीय भोगाईलाई समेट्ने कार्यक्रमको ध्येय रहेको छ । जेष्ठ नागरिकलाई आइपर्ने समस्या र त्यसलाई समाधान गर्न गर्नुभएको प्रयास आजको पिढीँलाई मार्गदर्शन समेत हुने संस्थाको विश्वास रहेको छ । 

सहकारी पसल क्रेडिट कार्ड 
दैनिक उपभोग्य वस्तहरू विक्री गर्ने उपभोक्ता सहकारी पसल । जहाँ पैसा नहुँदा पनि सहकारीका सदस्यले अधिकतम ३० हजार सम्मको कारोबार गर्न सक्नेछन् । उक्त क्रेडिट कार्ड मार्फत दैनिक उपभोग्य वस्तुहरू खाद्यान्न, तरकारी लगायतका वस्तहरू खरिद गर्न सकिने संस्थाका प्रमुख व्यस्थापक गौतम प्रजापतिले जानकारी दिए । निवेदनको आधारमा सदस्यको सहकारीमा बचत, नियमित मासिक बचत लगायतका मानकका आधारमा सदस्यको अधिकतम कारोबार सीमा तय गरि कार्ड प्रदान गरिने संस्थाले जनाएको छ । त्यसरी ऊधारोमा वस्तु तथा सेवा खरिद गरेवापत सदस्यले ३५ दिनभित्र रकम भुक्तानी गर्नुपर्ने हुन्छ ।  

कार्डमा सदस्यको नाम, मोबाइल नम्बर, सदस्यता नम्बर, फोटो समावेश गरिएको हुन्छ । कार्डको पछाडिको भागमा रहेको कार्डको रंगबाट सदस्यले प्राप्त गर्ने अधिकतम कारोबारको जानकारी प्राप्त गर्न सकिने संस्थाले जनाएको छ।  
पहेको रंगले कम, हरियोले मध्यम र रातो रंग भएको कार्ड प्राप्त गर्ने सस्यले अधिकतम कारोबार गर्ने सक्ने संस्थाका प्रमुख व्यवस्थापक गौतम प्रजापतिले जानकारी दिनुभयो । हाल देवीस्थान सेवा केन्द्रमा एक पसल रहेको छ । साथै थप १।२ वटा पसलसँग समन्वय गर्ने तयारी रहेको संस्थाले जनाएको छ । हाललाई क्रेडिट कार्डमा भएको खाता नम्बरको आधारमा कारोबार हुने संस्थाले जनाएको छ । 

संस्थाले समुदाय र सदस्य केन्द्रित सेवाहरू क्रमश: परिष्कृत र थप गर्दै जाने जनाएको छ ।