नमन उपभोक्ता सहकारी संस्था लि. को १६ औँ वार्षिक साधारण सभा सम्पन्न

महांकाल गाउँपालिका वडा नं. ५ नमनडाँडा स्थित नमन उपभोक्ता सहकारी संस्था लि. को १६ औँ वार्षिक साधारण सभा  सम्पन्न भएको छ । जिल्ला समन्वय समिति ललितपुरका प्रमुख ऋषिदेव फुँयालको प्रमुख आतिथ्यतामा कार्यक्रम सम्पन्न भएको हो । 

मंसिर ३० गते नमनडाँडा स्थित श्री सरस्वती माध्यमिक विद्यालको प्राङ्गणमा आयोजित कार्यक्रममा सञ्चालक समितिका अध्यक्ष रामहरि दाहालले २०८१ को वार्षिक प्रतिवेदन प्रस्तुत गर्नुभएको थियो । 

त्यस्तै लेखा तथा सुपरिवेक्षण समितिको तर्फबाट संयोजक शेषानन्द बजगाईंले प्रतिवेदन प्रस्तुत गर्नुभएको थियो । सँगै संस्थाका कोषाध्यक्ष मिलन वाईबाले संस्थाको आर्थिक प्रतिवेदन पेश गर्नुभएको थियो । 

कार्यक्रमलाई सम्बोधन गर्दै जिल्ला समन्वय समिति प्रमुख फुयाँलले समाजसेवा सामान्य विषय नभएको र सहकारीले जनताको सम्पति संकलन गरेर जनतालाई नै प्रवाह गर्ने हुँदा ठुलो दायित्व रहेको बताउनुभयो । समाजसेवाको काम गर्दै अगाडि बढ्नुभएका सञ्चालक समितिका वर्तमान र पूर्व पदाधिकारीप्रति आभार व्यक्त गर्नुभयो । 

संस्थाले सभाको अवसरमा स्वास्थ्य परिक्षण गरि सिर्जनशीलताको काम गरेकोमा आभार व्यक्त गर्नुभयो । उहाँले असोज १०-१२ गतेको अविरल वर्षाले निम्त्याएको बाढी पहिरोले सडक, घर क्षीण बनाएको सम्झदै ललितपुरको यस क्षेत्रमा मान्छे बस्न योग्य ठाउँ बनाउनुपर्ने बताउनुभयो । उहाँले सडक, शिक्षामा सुधार गरि बसाइसराई रोक्नुपर्नेमा जोड दिनुभयो । 

यसअघि मंसिर २२ गते संस्थाले पनौती तथा चापागाँउमा सदस्यहरूको सहजताको लागि छलफल, सुझाव संकलन र परिवहन खर्च उपलब्ध गराउने कार्यक्रम सञ्चालन गरेको थियो । 

 उक्त अवसरमा ज्येष्ठ नागरिक हेल्थ केयर फाउन्डेसन नेपाल र मेघा अस्पताल प्रा.लि. को आयोजना तथा स्थानीय स्वास्थ्य संस्था चन्दनपुर स्वास्थ्य चौकीको संलग्नतामा २०० जनाभन्दा बढी सदस्यहरूको स्वास्थ्य परीक्षण गरिएको संस्थाका व्यवस्थापक झन्जबहादुर गोलेले जानकारी दिनुभयो । 

कार्यक्रममा सहकारीका सल्लाहकार, पूर्व अध्यक्षहरूले सहकारीले समुदायमा खेलेको भुमिकाको चर्चा गर्दै सुधार गर्दै अगाडि बढ्नुपर्ने बताउनुभएको थियो ।  

संस्थाका अध्यक्ष रामहरि दाहालको अध्यक्षतामा सम्पन्न कार्यक्रमको सञ्चालन संस्थाका सचिव श्याम केसीले गर्नुभएको थियो ।